Os habitants d’a Franja tendrán guaranciada a suya asistencia sanitaria en Catalunya

No se conoixe a concreción de l’alcuerdo, y se creyará una comisión tecnica ta estudear l’atención sanitaria

Os conselleros de Sanidat de Catalunya y Aragón han plegau a un alcuerdo ta que os habitants d’a Franja oriental d’Aragón tiengan l’atención sanitaria guaranciada en o país vecino. O compromiso de totz dos conselleros ye solucionar de forma immediata os problemas que han complicau en zagueras un adequau servicio a os ciudadans d’a zona de buega entre os dos países.

Tamién se comprometioron a analisar conchuntament os puntos de discrepancia por lo que fa a iste tema, y a buscar solucions de consenso.

Totz dos consellers coinciden que a rilación sanitaria entre os dos servicios publicos ha d’estar de total normalidat, y por ixo han pensau de creyar una Comisión Tecnica d’Estudeo ta evaluar l’asistencia sanitaria entre Aragón y Cataluña y creyar una colaboración. Ista comisión ha d’elaborar un marco estable de consenso en materia d’asistencia sanitaria y que podese estar un alazet ta fer o mesmo planteyamient a livel estatal, previo alcuerdo con o ministerio espanyol d’o ramo.

Totz dos consellers teneban prevista una reunión ta l’11 de noviembre en Lérida, que han rezagau a una proxima cita ta ya treballar en ixa comisión tecnica. Seguntes o gubierno “con iste alcuerdo se fa platera a voluntat politica de meter fin a o problema de l’asistencia sanitaria entre Aragón y Catalunya y se potencian encara mas os intensos “lazos de vecindad” existents entre os dos países.

Os habitants d’a Franja tendrán guaranciada a suya asistencia sanitaria en Catalunya « Arredol.