\nDe nuevas tornan as Cortes d\u2019Aragon a tratar a q\u00fcestion d\u2019as luengas d\u2019Aragon. Diz que esta vegata ye a finitiva. Bien, pero: se puede fer una lei de luengas sin o refirme d\u2019os suyos parladors? Ye m\u00e9s, se puede fer una lei de luengas con a oposicion de buena cosa d\u2019os suyos parladors? Perque, qu\u00e1l ye a opinion d\u2019os parladors en este afer?
\nSeguntes totas as enq\u00fcestas e toz est\u00fadios feitos sobre o tema, ni os parladors d\u2019aragon\u00e9s se reconoixen n\u2019o est\u00e1ndar que proposan as asociacions que dicen representar a luenga, ni os parladors de catalan d\u2019Aragon se reconoixen n\u2019o catalan normativo que se quiere oficializar agora. Imposar modelos ling\u00fcisticos sentitos como allenos no fer\u00e1 que acelerar a muerte d\u2019as nuestras luengas minorit\u00e1rias.
\nRespective a l\u2019aragon\u00e9s, ye menister una miqueta d\u2019humildat e de sentito comun. Ye de dar que este modelo d\u2019aragon\u00e9s que escrivo ye valero ta charradors d\u2019aragon\u00e9s centro-oriental, pero ye raro arrienda ta toz os atros. Hemos de partir dende a realidat actual, no pas dende a situacion ling\u00fcistica de fa 200 anyos. E a realidat ling\u00fcistica actual ye a d\u2019una luenga prou dialectalizata t\u2019a que cal establir diferents sub-est\u00e1ndars seguntes as zonas. Ixo no significa pas renunciar a la unidat d\u2019o idioma. Ye justo o contr\u00e1rio. Ye fer cepren ta conservar o muito que tenemos en comun en toz os dialectos. Ye fer cepren ta escoscar os castellanismos e os catalanismos innese\u00e7\u00e1rios; repito, os innese\u00e7\u00e1rios, no se puede afor\u00e7ar. E, prou que s\u00ed, ye fer cepren ta mantener as peculiaridaz de cada variedat local.
\nE per ixo, ye menister que o Consello Asesor dixe de prener resolucions unilaterals. Ye menister que o Estudio Filol\u00f3gico Aragon\u00e9s dixe d\u2019autoproclamar-se Academia de l\u2019Aragon\u00e9s<\/em> e que dixe de presentar-se como l\u2019autoridat ling\u00fc\u00edstica que no ye. Ye menister que a Sociedat Ling\u00fc\u00edstica Aragonesa albandone ixa actitut balloquera suya e dixe de creyer-se que toz os atros no saben ni meya. Ye menister trobar gent de cada val que s\u2019embrequen en a fayena de crear modelos locals, gent que treballen dimpu\u00e9s de conjunta ta fer est\u00e1ndars comarcals. Con l\u2019asesoramiento d\u2019espertos, per qu\u00e9 no, pero conoixendo a realidat, ling\u00fcistica e social, de cada zona. De vez, se iria fendo o nese\u00e7\u00e1rio treballo de concenciacion, perque, encara que nos pene, l\u2019aragon\u00e9s contina estando considerato per muitos como un dialecto basto e in\u00fatil. Pero tot e siempre partindo de cada val, de cada situacion concreta.
\nCal empencipiar, per eixemplo, per estatuecer una grafia comun. Pero una grafia que faiga honra a la luenga, no que le faiga a tana. Yo me pregunto si querran os pairs matricular a la suya mainada en una asignatura de luenga aragonesa que les ensenye a escrivir con una ortografia que no fa que estorbo a la ortografia espanyola. Me pregunto tamien si querr\u00e1 ixa mainada matricular-se en una asignatura de luenga aragonesa que les ensenye una ortografia tan embolicata como lo ye esta que soi emplegando agora. A sovent me pregunto si no seria millor trobar un punto meyo entre a utopia fonetica e a utopia etimologista; si no seria millor trobar una grafia que no faiga mal a os uellos sin dixar d\u2019estar simpla e de buen escrivir. (Ya sabez os que me conoxez que no remato de creyer-me esta grafia SLA, pero ixo ye atra hist\u00f3ria; e un contrasentito, ya lo s\u00e9).
\nRespective a o catalan, ye menister crear una autoridat ling\u00fcistica regional. No se puede dixar a luenga en mans d\u2019o Institut d\u2019Estudis Catalans como esfiende a proposa actual de lei. E no solo perque no puede permitir-se que a nuestra mainada est\u00fadie con libros de texto que charren de Pa\u00efsos Catalans, que nunca no esistion, e neguen l\u2019aragonesidat d\u2019os aragoneses que parlan catalan, sino, tamien, perque dixar que o Institut d\u2019Estudis Catalans se faiga cargo d\u2019a luenga ye certificar a fin d\u2019as peculiaridaz d\u2019o catalan d\u2019Aragon. Ya l\u2019hemos visto en Balears: se normaliza o nombre d\u2019as carreras de Palma e o que yera, per eixemplo, S\u2019Aiguo ye agora L\u2019Aigua. Adi\u00f3s, altalle, a os imperfectos en \u2013va u a os subjuntivos en \u2013o, entre atras muitas rique\u00e7as d\u2019os nuestros parlars. E prou que esfender a variedat dialectal d\u2019o catalan d\u2019Aragon no significa renunciar a una comunidat formata per millons de charradors, una comunidat con a vitalidat cultural que tiene, e ha tenito en atras envueltas, a comunidat ling\u00fc\u00edstica catalana. Esfender a variedat dialectal significa esfender o pr\u00f3pio devant de l\u2019aplanadera tend\u00e9ncia uniformadera que tienen as autoridaz catalanas que nunca no quieren diferenciar entre politica e cultura. Perque relacionar as luengas d\u2019Aragon con os nacionalismos aragon\u00e9s u catalan ye o pior serv\u00edcio que le podemos fer a o patrim\u00f3nio cultural d\u2019Aragon.
\nProu que a fayena no ye f\u00e1cil, pero ye polita, muito polita.<\/div>\n