“Una tardada por a luenga aragonesa”, en a cafetería d’a Facultat d’Educación | Arredol

“Una tardada por a luenga aragonesa”, en a cafetería d’a Facultat d’Educación | Arredol.

Bi habrá actividatz culturals enreligadas con a luenga aragonesa y una actuación mosical sorpresa

Iste chueves, dende as 20:00, a cafetería d’a Facultat d’Educación acullirá una chornada ludica arredol d’a luenga aragonesa, en o marco d’as actividatz de l’Espacio 3E. O Trango, l’asociación organizadera de l’evento anuncia “buena cosa de chuegos y actividatz culturals”.

Entre ellas, se ferá una amostranza de mosica y instrumentos tradicionals aragoneses, se pararán chuegos y actividatz culturals enreligadas con a luenga aragonesa y se prochectarán bells videos curtos arredol d’a suya amostranza. Tamién bi habrá sorteyos y regalos y se i podrá ascuitar mosica en aragonés, antimás d’haber-ie una “actuación sorpresa“.

“Con iste acto, se mirará d’informar y concienciar en o tocant a la situación d’iste patrimonio cultural propio d’a nuestra tierra, en feble situación y a la que le cal promoción y protección, como reconoixen organismos y documentos legals nacionals y internacionals, tals como a Carta Europeya d’as Luengas Rechionals u Minoritarias, o Consello d’Europa, a UNESCO, a Constituxión y o Estatuto d’Autonomía d’Aragón. Con isto se quiere empentar a reflexión sobre o papel d’a comunidat educativa en cheneral y d’a nuestra Facultat d’Educación en particular, ta guaranciar o esdevenidero d’iste patrimonio”, sinyalan dende a organización.