“Los Calderons” remeran a los reis a on ye La Fraixneda | Arredol.
Os ninos d’o lugar fan una gambada fendo estrapalucio por tot lo lugar
Carrera Mayor de La Fraixneda (Foto: Wikipedia)
Iste sabado La Fraixneda (Matarranya) celebra a suya tradición de Los Calderons, a on que a catrinalla d’o lugar recorre as carreras d’o lugar fendo firme estrapalucio con calderons y fierros. Lo fan ta remerar a los reis magos que no pasen de largo y dentren en o lugar a deixar-ie os presents.
Ista tradición no sé sabe guaire bien d’a on vien, pero sí que leva arrienda anyadas fendo-se y que pasa de pais a fillos. A las diez d’o maitín a mainalla se chunta en a plaza ta fer una chicolatada y prener “os calderons”: coberteras, cazos, ollas viellas, latas u qualsiquier ferrinchón que faiga bien de rudio.
Dende astí recorren o lugar ta empachar que os reis s’espisguarden y no i aturen. Si lo consiguen, os reis bi plegarán, sobre os suyos caballos a las siet d’a tardi t’a capilla d’o lugar, a on que darán a totz os ninos os suyos presents.