Albandono momentanio de l’enzarre d’os miners de Mequinenza | Arredol.
O Ministerio d’Industria espanyol ha decidiu finalment de incluyir a Carbonífera del Ebro en o Decreto de Guarancia de Suministro, encara que dimpués d’estudiar un informe tecnico
Foto: CHA
Cinco miners s’enzarroron en o Pozo Europa de Mequinenza o pasau 7 de febrero en respuesta a que o Ministerio d’Industria espanyol no heba incluyiu a la suya interpresa, Carbonífera del Ebro, en a Resolución de restriccions por Guarancia por Suministro de 2013. Os miners han albandonau l’enzarre por agora, dimpués que en o BOE o ministerio i haiga incluyiu a ista interpresa en o Decreto de Guarancia de Suministro, siempre y quan, a central termica siga compatible con o carbón de Mequinenza.
Manimenos, encara no se sabe quála será a central trigada ta cremar 90.000 toneladas d’ista mina, pero no será en Andorra. A central a on se cremaba iste carbón yera a central termica d’Escucha, pero ista trancó en o cabo de 2012, y Endesa se negaba a cremar o carbón de Mequinenza por “razons tecnicas” en a central d’Andorra.
A decisión final d’o Ministerio d’Industria sobre a crema d’iste carbón se ferá efectiva dimpués de estudiar un informe tecnico que habrá de fer-se por una interpresa independient ta valurar si a crema d’iste carbón ye compatible con a central termica a on se ferá servir.