S’amana lo diya. ¿Minilei de luengas?
Martes, Octubre 6, 2009 19:38
O chuebes benient se botará en as Cortes a posibilidat de tramitar a Ley d’as Luengas presentada fa dos meses por o PSOE. Istos diyas os periodicos editaus en Aragón han beniu fendo notizias sobra a dificultat de fer aplegar as boluntaz d’os dos partius que gobiernan o país. Güe mesmo, l’Heraldo y o Periodico feban notizias sobre o tema, trucando o ficazio en o catalán como prenzipal problema.
Amás istos diyas emos conoxiu como primer 6, dimpués 12, 14, y mesmo 20 asambleyas locals d’o PAR (bellas d’ellas unipresonals, en o millor estilo FACAO) mesmo menazaban con fer una corrient interna en o partiu si s’aprebaba una lei de luengas que reconoxés o catalán como luenga propia d’Aragón. Ixa ye a desincusa d’o PAR ta no refirmar o proyeuto d’o PSOE. O millor dito, ixa ye a estratechia d’o PAR ta no refirmar-la, quitar 20 indocumentaus enta la carrera ta dizir que la oposizión interna no lis premite aprebar a lei.
Ye triste pensar que toda ista pantomima con a lei de luenga nomás ye una luita de poder dentre os partius de Gobierno que chugan con os dreitos umans, dreitos umans, dreitos umans de milentas d’aragoneses. Si o PSOE queriés de berdat aprebar a lei ta normalizar l’uso de l’aragonés y d’a luenga materna d’o president podria fer-lo refirmando-se en atros partius y no pautando retallar encara más una minilei. Ye triste pensar que una lei tan de menimos que no guaranzia garra dreito a os aragonesofablans y catalanofablans sirbe ta dar iste show de autoodio coleutibo, de zaragozentrismo baturrero y de negazión d’a reyalidat.
Ye triste pensar que pase o que pase o chuebes ista minilei no serbirá ta cosa y que nomás l’esprito de perbibenzia d’os fablans continará fendo bibir as luengas d’Aragón. Os aragoneses fablamos en tres luengas. Aragón ye un país trilingüe, anque os nuestros politicos continen fendo o ridiculo debant d’as instituzions mundials como a Unesco, europeas como o Consello d’Europa y mesmo contra as leis que ellos mesmos han aprebau, como a Constituzión española y l’Estatuto d’Autonomía d’Aragón.