O PSOE torna a fer burro falso con a lei de luengas
Miércoles, Julio 1, 2009 15:57
L’optimismo estió una atra begada sin chustificazión. O PSOE van tirar entazaga unatra begada as suyas intinzions de rechistrar a ley de luengas en as Cortes. Tot i que os abanprocheutos que emos puesto beyer son, digamos que, millorables, y sobre tot, luen d’as espeutatibas, o PSOE no s’ha atrebiu a presentar-le, por l’inte, en solitario.
Nomás en salir a notizia os amigos d’o PAR, FACAO, PNHC etzra, inundoron as redauzions d’os meyos con notas de prensa an dixan salir todas as suyas mentiras, fatezas y simplezas. Pero o PSOE no s’ha tirau entazaga por ixas notas de cuatro iluminaus, no. O PSOE no ha quiesto meter en problemas o gobierno de coalizión con un PAR que no sabe que fer. Bi ha alcaldes d’o PAR que refirman una lei de luengas ta l’aragonés y o catalán, y bi ha chen d’o PAR que refirma as tesis absurdas d’os FACAO’s. Y si a corrupzión no ha desfeito o Gubierno, ¿como os dreitos de 80.000 aragoneses podra fer-lo?
Asinas que dimpués de tot lo martes asperando a presentazión en o rechistro d’as Cortes, o PSOE no fazió auto de presenzia y una begada más cal asperar a que a la fin se dezidan a lebar entabán a iniziatiba. Tamién cal fer una reflexión sobre a postura d’os atros partius. No pas o PP, que ya sabemos que ixo d’a libertad de luenga nomás lo fan serbir ta Cataluña y Euskadi, pero no pas t’aquí, porque a unica libertad que reclaman ye ta lo castellán y as atras luengas lis bufan la pocha. No pas o PAR, que ye presumible que no refirmarán una lei que abale o que dizen os zientificos, ye dizir, que cal lechislar a situazión d’o catalán (y de l’aragonés) en Aragón. IU y CHA si que tienen que dezidir bellas cosas. IU porque de begadas diz una cosa y de begadas atra. Os dos, porque abran de balurar si quieren una lei de menimos o no quieren lei. Y CHA, porque tenendo esclatero que son os que más refirman a luenga de parola, no ye normal que no aigan presentau un procheuto de lei como o que quiere presentar o PSOE (que presentará la lei dende o gobierno sino como partiu)
Ta bariar os meyos españols, como ABC, La Razón o El Mundo, han quiesto beyer una persecuzión d’o castellán, o bella cosa asinas, y xublidan ixo d’a libertad d’eleuzión y o bilingüismo que tanto dizen t’atros puestos. Asinas, fendo disparixer cualsiquier rastro de periodismo, y fendo propaganda antiaragonesa y anticultural, han publicau cosas rarizas sobre a imposizión de luengas, cuan lo que se reclama ye igualdat y dreitos, y sobre tot, cuan la lei que quiere presentar lo PSOE ye a más toba que nunca no ha abiu en garra lechislazion sobre luengas en cualsiquier parti d’o mundo
Jordi Hereu y as luengas d’Aragón
Amás l’ABC ha feito (queriendo o sin querer) una error grau. Fablando d’a lei de luengas d’Aragón han publicau una foto de l’alcalde de Barcelona, Jordi Hereu, que me pienso que no tiene cosa a dizir sobre a lei en Aragón, y sisquiá tiene cosa a beyer con a politica cultural catalana. Pero bueno, puestar que siga por ixo d’a inbasión d’os catalans o cualcosa asinas.
Posts relacionados:
O PSOE torna a fer burro falso con a lei de luengas | Purnas en o zierzo.