D’os 15.000 metros quadraus en venta, más d’a meitat son propiedat de l’alcalde de Montanui

10 noviembre, 2011 | Ribagorza | Autor: Arredol | 

Foto d’a publicidat en masparcelas.com

Ecologistas en Acción ha denunciau a venta d’o lugar d’Aneto, que perteneix a o monecipio de Montanui, vinclau a o prochecto de Castanesa, empentau por l’anterior gubierno y por Aramón.

O colectivo ecolochista denuncia que en l’anuncio en una web de venta de parcelas, se presenta una parcela ta urbanizar d’uns 15.000 m2 y con capacidat ta 75 vivendas por un pre de 2.750.000 euros.

Sin dembargo, Ecologistas en Acción fa saper que a finca corresponde a parcelas feitas urbanizables en o Plan Cheneral d’Ordinación urbana que premite a colocación d’una estación d’esquí en a val de Castanesa y a construcción de 4000 nuevas viviendas.

Encara que se presente como una parcela unica, a venta ye composada de varias fincas, d’as que en ye propietario José María Agullana, seguntes Ecologistas en Acción, vecin d’Aneto y actual Alcalde de Montanui por o PSOE, como lo ha siu en as zagueras tres lechislaturas que coinciden con a empenta d’o prochecto de Castanesa y os plans d’Ordinación Urbana.

Seguntes EeA as fincas de l’alcalde suman 8231 metros quadraus d’os 15.000 en venta. Istas fincas yera de sulero rustico, con una valor de 5000 euros, y a suya recalificación premitiria un beneficio d’un millón y meyo d’euros. Ecologistas en Acción tamién denuncia que l’alcalde de Montanui, Agullana, ye, a titulo presonal miembro d’o consello d’almenistración d’a interpresa “Castanesa nieve”, propietaria de totas as fincas mercadas por Aramón en o monecipio, tamién recalificadas de rusticas a urbanizables.

Alcalde d’o PSOE vende terrenos ligaus a o prochecto de Castanesa « Arredol.